Wat vun mi . . .

Mien Öllern snacken beid' plattdüütsch, wenn se sik wat to vertelln harrn, aber mit mi snacken se hochdüütsch. Ober doch heff ik veel hört un kunn mit mien Unkels un Tanten, de rundüm leben, ok plattdüütsch snacken, wi mien Öllern. Wi Jungs vun de Noberschop snacken bi 't Speelen sowieso nur Platt, ok de Flüchtlingskinner, de 1945 no Norddüütschland keemen. Mien Moder vertell mi Geschichten un Märchen - 'n barg dorvun op platt - so as de vun den armen Müllerjung Hans un sien lütt Katt. As ik gröter weer, köff mien Moder mi 'n Book vun Rudl Kinau un een vun Fritz Lau. Dat weer de Grundstock to mien "Bibliothek", de hüüt ut mehr as 220 Böker vun verschiedene Schrieber besteiht :
Bärthel - Bull - Bullerdiek - Christoffers - Ehlers - Fock - Groth - Harder - Kinau - Lau - Lornsen - Sieg - Spiekermann - Reuter - Tarnow - Wisser.
Max un Moritz stoht neben Asterix un Obelix un den lütten Prinzen un ok de plattdüütsche Faust fehlt nich. De 200 Strophen vun Herrn Pastor sien Koh heff ik all lest aber noch nich all sungen.
In disse Spraak gifft dat ober nich nur vergnögliche Geschichten; nee, Fritz Lau ton Biespill, vertellt ok vun Lüüd, de dat nich jüst goot geiht.
1995 schull ik in den Seniorenkrink vun unse Karkengemeen mol wat vörlesen. Ik wull dor nich mit so 'n Stopel Böker hin un heff mi de Arbeit mokt, Geschichten utsöcht un mit den Computer wedder to Papier bröcht. Dat geev bannig veel Geschichten, de irgendwat mit de Kark to don harrn, so keem ik to mien Textsammlung "Plattdüütsch rund üm de Kark", ut de ik al foken vörlest heff in'n Gottesdeenst un bi de Landfraun - natürlich ohne Honorar; denn dat geiht jo nich wegen dat Copyright.
Ik mokt de Vörarbeit för  'n plattdüütschen Gottesdeenst; un mit twee Fraun deelt wi uns de Lesungen op. Dorto brukt wi natürlich dat passende Gesangbook un de plattdüütsche Bibelöbersettung. Unse Pastorin kunn in de ersten Johrn wenig platt, aber dat het sik bit 2010 ännert. Se schrift veele Texte, snackt ok good un brukt sik denn nur noch üm de Lithurgie to kümmern - dat kriggt se denn ok fein op de Reeg. In de Uetersener Klosterkark heff ik ok all mehrere Gottesdeenste organiseert.
Mien Wunsch weer ümmer, ik müch mol so 'n Krink tosomenkriegen, wo nich bloots een de annern wat vörlest - ne, dat geiht rundüm, jeder kummt mol an. Sodenni kann man mehrere lütte Geschichten oder een gröteres Wark lesen un denn dor öber snacken. Viellicht finn ik jo noch mol 'n poor Mackers. Siet Dezember 2000 bün ik in den Plattdüütschen Krink in Uetersen in't Klepperhus, dat mokt veel Spoß! Intwischen bin ik de Baas von den Krink, aber leider sünd bit jetzt (2011) ok all 4 von de öllern Lüüd storben.

Henri Ossenbrüggen
 Opn Toppeesch 6 Homepage : http://henri.ossenbrueggen.com
 25482 Appen
 Tel. 04101 – 2 99 81             E-Mail :         henri.@ossenbrueggen.com